Kreu I shëndetësisë së Pekinit, doktor Gau Fu deklaroi se Kina nuk do të ndërmarrë vaksinime masive të popullatës. Arsyeja sipas tij, është e thjeshtë: Covid 19 është zhdukur në masë të madhe nga vendi. Vaksinimi në shkallë të gjerë sipas Fu, nuk do të jenë i nevojshem përsa kohë sëmundja është nën kontroll. Nëse në të ardhmen situata precipiton sërish, atëherë kryespecialisti i shëndetit thotë se strategjia mund të ndryshojë. Kina regjistroi 29 raste të reja ne 24 ore dhe asnjë vdekje nga koronavirusi. Autoritetet vendase kanë besimin se rreziku I një rikthimi të fortë të sëmundjes, për momentin nuk ekziston. Vaksinimi do të bëhet I pjesshëm, me në fokus fillimisht stafin mjekësor. Punonjësit e sigurisë gjithashtu do të jenë ndër kategoritë të cilave do t`u administrohet vaksina në këtë fazë, të pasuar nga sanitaret, stafi I shërbimeve të kateringut dhe nëpunësit civilë. Në mbarë botën, shkencëtarët janë vënë në garë për krijimin e një vaksine të koronavirusit. Kina është duke zhvilluar të paktën tetë vaksina kandidate dhe po përpiqet fortë të kthehet në vendin e parë të botës që të realizojë një vaksinim të suksesshëm kundër patogjenit të rrezikshëm.