Gjermania nisi një izolim të ri, të vështirë, duke mbyllur shkollat dhe bizneset jo të domosdoshme në një përpjekje për të ndaluar rritjen e infektimeve me koronavirus. Masa do të jetë në fuqi deri më 10 janar. Krishtlindjet do të shohin një zbutje të lehtë, me mundësinë e pritjes në një shtëpi të deri në katër pjesëtarëve të afërt të familjes. Vendi raportoi 952 viktima, shifër rekord kjo që nga fillimi i pandemisë, dhe 27728 raste të reja të mërkurën. Vende të tjera evropiane kanë ashpërsuar kufizimet e krishtlindjeve, me francën që riktheu ndalim qarkullimin gjatë natës. Nën masat e reja në gjermani, vetëm bizneset e domosdoshme si supermarketet dhe bankat do të lejohen të qëndrojnë hapur. Restorantet, baret dhe qendrat e argëtimit janë mbyllur që në nëntor dhe disa zona të vendit kanë vendosur izolimet e tyre sipas nevojës. Parukeritë janë mes bizneseve që duhet të mbyllen ndërsa konsumi i alkolit në vende publike, është i ndaluar. Kompanive u është kërkuar të lejojnë punonjësit të punojnë nga shtëpia. Në anën tjetër, Franca zëvendësoi izolimin e saj të dytë kombëtar me një ndalim qarkullimi nga ora 20.00 deri në 6 të mëngjesit. Njerëzit nuk do të lejohen të dalin nga shtëpia në këtë fashë orare pa autorizim. Mbrëmja e krishtlindjes do të bëjë përjashtim por rregulli do të mbetet në fuqi për vitin e ri. Baret dhe restorantet do të mbeten të mbyllur të paktën deri më 20 janar. Numri i viktimave në francë u rrit me 790 të martën për një total prej 59072. Holanda është vënë nën izolim pesë javor, masa më strikte kjo e ndërmarrë në vend që nga fillimi i pandemisë. Por kufizimi do të zbutet pakëz vetëm për tre ditë gjatë krishtlindjes. Në britaninë e madhe, Londra nisi masat e izolimit të shkallës më të lartë sot ndërsa në itali, qeveria ende po shqyrton shtrëngimet për festat e fundvitit.