Perspektiva e një bumi të shpenzimeve ushtarake nga Gjermania, dicka e paprecedentë kjo që nga Lufta e Ftohtë, bëri që stoqet e mbrojtjes të Evropës të rriteshin pasi agjencia e lajmeve Reuters raportoi se qeveria e ardhshme gjermane po shqyrton mundësinë e një ndryshimi drastik fiskal për ekonominë më të madhe të Evropës. Kontraktorët e mbrojtjes duke përfshirë Thyssenkrupp, Hensoldt, Renk, Rheinmetall, BAE Systems dhe Leonardo kanë shënuar në bursa një rritje dyshifrore të aksioneve të tyre pas lajmit se konservatorët fitues të zgjedhjeve në gjermani, dhe social demokratët e qendrës së majtë, po mendohen për krijimin e fondeve të posacme për mbrojtjen dhe infrastrukturën në një vlerë prej afro 1 trilion eurosh. Asnjë nga partitë nuk ka konfirmuar zyrtarisht se një fond special për mbrojtjen me vlerë 400 miliardë euro dhe një tjetër për infrastrukturën me vlerë deri në 500 miliardë euro, një shumë kjo që së bashku do të arrinte në 20% të Produktit të brendshëm bruto të vendit, janë në diskutim, Por zyrtarë të lartë nga të dyja palët folën për nevoja urgjente. "Ka një nevojë të madhe për investime dhe ne nuk do të krijojmë pëlqim nëse investojmë vetëm në mbrojtje," tha të hënën Sekretari i Përgjithshëm i SPD, Matthias Miersch. "Të dyja duhet të konsiderohen së bashku". Diskutimet janë pasojat më të fundit të qëndrimit të ftohtë të SHBA-së ndaj Evropës që kur Presidenti Donald Trump u kthye në Shtëpinë e Bardhë, për cka përplasja e së premtes mes Trumpit dhe presidentit ukrainas Volodymyr Zelenski, ishte ilustrimi më dramatik.“Edhe sikur këto fonde të shpenzoheshin përgjatë 10 vjetëve, kjo do të ishte po aq sa ka investuar vendi në Gjermaninë Lindore që nga ribashkimi”, shkruan Deutsche Bank. "Do të ishte një ndryshim i regjimit fiskal me përmasa historike."Gazeta Bild raportoi se një seancë e jashtëzakonshme e parlamentit mund të thirret të hënën e ardhshme për ti hapur rrugë miratimit të masës me mbështetjen e të Gjelbërve. Për dekada, Gjermania ka qëndruar pasive në mbrojtje, deri në vitin 2023, duke shpenzuar më pak se objektivi i NATO-s prej 2% të prodhimit ekonomik për mbrojtjen. Me pushtimin e Ukrainës nga Rusia, gjithcka ndryshoi.