Komunitetet fetare në Shqipëri janë bashkuar dhe përmes një deklarate bëjnë thirrje për dhënien fund të luftës në Gaza. Deklarata e përbashkët është përcjellë përmes Këshillit Ndërfetar të Shqipërisë. Ne komunitetet fetare në Shqipëri, bashkojmë zërin tonë me thirrjet ndërkombëtare të organizatës Religions for Peace Europe, institucion ku ne bëjmë pjesë, thirrjes së fundit të Patriarkanës Latine dhe asaj Ortodokse të Jeruzalemit, thirrjes së 80 rabinëve ortodoksë nga e gjithë bota, komuniteteve islame dhe të krishtera nga mbarë bota, OKB-së dhe institucioneve të tjera ndërkombëtare, ku me apelin e tyre, ata shprehin shqetësimin e thellë për situatën dramatike humanitare në Gaza dhe Bregun Perëndimor, duke kërkuar përfundimin e menjëhershëm të luftës dhe lirimit të të gjithë pengjeve. Në frymën e solidaritetit ndërfetar dhe të përgjegjësisë morale që feja mbart, Këshilli Ndërfetar i Shqipërisë riafirmon se paqja e qëndrueshme mund të ndërtohet vetëm mbi drejtësi, mëshirë dhe respekt të ndërsjellë. Deklarata është mbështetur nga Komuniteti Mysliman Shqiptar, Kisha Katolike, ajo Ortodokse, kryegjyshata botërore bektashiane dhe vëllazëria ungjillore e Shqipërisë.