Presidenti i Shteteve të Bashkuara të Amerikës, Joe Biden, duket se ka njoftuar aksidentalisht gjatë fjalimit të tij përpara ushtarëve amerikanë në Poloni ndërhyrje ushtarake në Ukrainë. Duke vizituar një dizivion të trupave amerikane në Poloni, në kufi me Ukrainën, kreu i Shtëpisë së Bardhë tha se ushtarët do ta kuptonin se sa trima ishin njerëzit në Ukrainë, në momentin që do të shkonin atje. ‘Njerëzit në Ukrainë janë shumë trima. Do ta shikoni vetë kur të jeni atje, do të shikoni gra dhe të rinj që qëndrojnë përpara tankut, pa iu dridhur qerpiku, tha Biden. Menjëherë pas kësaj deklarate, Shtëpia e Bardhë sqaroi se trupat amerikane nuk do të dërgohen në Ukrainë, por Biden donte të thoshte se trupat do të afroheshin në kufi me Ukrainën. Një zëdhënës i Shtëpisë së Bardhë tha për “Fox Neës” se presidenti ka qenë i qartë, duke thënë SHBA nuk do të dërgojë trupa në Ukrainë dhe nuk ka ndryshim nga ky qëndrim. Më parë, Biden ka thënë se nuk do të ketë trupa amerikane në territorin ukrainas në asnjë rrethanë gjatë pushtimit të Putinit, pasi kjo mund të çonte në Luftën e Tretë Botërore.