Pikat kryesore të planit të presidentit amerikan, Donald Trump, për të arritur një marrëveshje paqeje në Ukrainë ende janë të paqarta, por ndasitë mes Evropës dhe Uashingtonit janë më të dukshme se kurrë, pas një jave retorikash paprecedent të drejtuar ndaj presidentit ukrainas, Volodymyr Zelensky. Friedrich Merz, që pritet të jetë kancelari i ardhshëm i Gjermanisë, është madje aq pesimist sa që parashikon që aleanca e NATO-s të mos vazhdojë gjatë me formën e saj aktuale. “Pas deklaratave të Donald Trumpit javën e kaluar, është e qartë që amerikanët janë indiferentë ndaj fatit të Evropës”, tha ai pas fitores së zgjedhjeve të së dielës, duke shtuar se “ëhstë shumë kureshtar të shohë se si do të shkojmë drejt samitit të NATO-s në fund të qershorit, nëse ne ende do të flasim për NATO-n në formën e saj aktuale, ose nëse duhet të krijojmë një kapacitet të pavarur evropian të mbrojtjes shumë më shpejt”. Ndërkohë, gjërat kanë ndryshuar në mënyrë drastike në krahasim me fillimin e pushtimit rus të ukrainës. Në prag të pushtimit, presidenti i atëhershëm amerikan, Joe Biden, paralajmëroi Rusinë se do të paguante “një çmim të lartë” nëse do të dërgonte autoblinda në Ukrainë. “Ka shumë çështje që ndajnë kombet tona dhe botën tonë, por kundërshtimi i agresionit rus nuk është një prej tyre”, tha Biden. “Populli amerikan është i bashkuar. Evropa është e bashkuar. Komuniteti transatlantik është i bashkuar. E gjithë bota e lirë është e bashkuar”. Këto supozime për unitetin dhe vendosmërinë perëndimore nuk duket se qëndrojnë më. Rusia dhe SHBA javën e kaluar nisën raundin e parë të komunikimit, në të cilin u përjashtua Ukraina, duke rritur shqetësimet se Uashingtoni dhe Moska mund të përpiqen të arrijnë një marrëveshje, duke anashkaluar ukrainasit dhe partnerët e tyre evropianë. Për më tepër, Trump duket se ka grisur një rregullore të vjetër për raportet SHBA-Rusi, duke dyfishuar sulmet ndaj presidentit ukrainas, Volodymyr Zelensky, duke e përshkruar madje atë si “diktator”, dhe duke sugjeruar se ai, e jo Putini, e nisi luftën. Kundërshtimet nga Kievi dhe kryeqytetet e tjera perëndimore kanë qenë të ashpra. Presidenti francez, Emmanuel Macro tha se përgjegjësi për luftën ka Rusia ndërsa Ukraina ka parë një shpërthim të mbështetjes publike nga e gjitha bota në shënimin e përvjetorit të tretë të luftës.