Ndërsa miliona amerikanë lëvizin lirshëm, ka shqetësime që shtimi i udhëtimeve dhe grumbullimeve masive mund të sjellë një valë tjetër të Covid-19. Spitalet në disa shtete janë të tejmbushur me pacientë. “Po vendosim rekord rastesh dhe kemi shifra rekord të të shtruarve në spitale që luftojnë Covid-19, apo të intubuar që luftojnë për jetën.”, shprehet Andy Beshear, guvernator i Kentucky-t. Rreth 100 mijë persona janë të hospitalizuar me Covid-19 në Shtetet e Bashkuara, sipas të dhënave zyrtare nga departamenti i shëndetësisë. “Një pjesë e kësaj ka ardhur si shkak i fushatave të mëdha të dezinformimit dhe njerëzit besojnë informacione që nuk janë të vërteta.”, deklaron Larry Hogan, guvernator i Maryland. Autoritetet shëndetësore po monitorojnë me kujdes një tjetër variant të quajtur “Mu”. “Aktualisht nuk përbën kërcënim”, thotë Anthony Fauci. Rregullatorët federalë po shqyrtojnë mundësinë e autorizimit të një doze përforcuese në javët e ardhshme. Virologu Fauci tha për CBS se Shtëpia e Bardhë dëshiron aplikimin e një doze të tretë duke nisur nga 20 shtatori, por ky plan vaksinimi duhet të marrë aprovimin e FDA dhe firmën e CDC. “Lajmi i mirë lidhur me vaksinat është se nëse zotëron një nivel të lartë antitrupash, gjë të cilën e mundëson doza përforcuese, mund të jeni të sigurtë që jeni të mbrojtur nga çdo variant.”, u shpreh Fauci.