Operacioni masiv i lirimit të hapësirave bregdetare të zaptuara në mënyrë të kundraligjshme me shezllonë e çadra ka përfshirë të gjithë territorin e vendit, nga Velipoja e deri në Vlorë. Mëngjesin e kësaj të mërkure Forcat e Ndërhyrjes së Shpejtë së bashku me Forcat speciale Shqiponjat kanë zbarkuar në vijën bregdetare, fill pas krimeve që po kryhen në vend për pak metra plazh e për shezllona, zanafilla e të cilave qëndron tek lejet për përdorimin e hapësirës bregdetare. Operacioni në Velipojë mori në shqyrtim 27 subjekte të cilat operonin në vijën bregdetare. Nga kontrollet e imtësishme policore u evidentua se dy prej tyre zinin më shumë hapësirë publike nga sa parashikohej në lejen e marrë nga portali qeveritar e-albania. Si pasojë e parregullsive u sekuestruan 40 shezllonë dhe 20 çadra plazhi.