Trafiku rreth Parisit arriti nivele rekord vetëm disa orë para se izolimi i ri kombëtar të hynte në fuqi në të gjithë Francën. Radhët e makinave u shtrinë për 700 km në rajonin e Ile-de-France, raportuan mediat lokale, të cilat thonë gjithashtu se shumë parizjanë po i largohen qytetit për ta kaluar karantinën në fshat. Masat e reja të ashpra u paraqitën si një domosdoshmëri nga presidenti Emmanuel Macron, i cili e bëri të qartë se vendi rrezikon “të mbytet nga një valë e dytë e sëmundjes, e cila sipas tij do të jetë padyshim shumë më e vështirë se e para”. Vdekjet ditore nga Covid-19 në Francë janë në nivelin më të lartë që prej muajit prill; të enjten autoritetet raportuan 47,637 raste të reja dhe 250 vdekje. Kancelarja Angela Merkel po ashtu paralajmëroi për një dimër të vështirë teksa mbronte vendimin për të nisur në Gjermani një izolim të butë kombëtar.