Rreth 500 të afërm të viktimave të COVID-19 në Itali bënë të ditur të mërkurën se kanë nisur veprimet ligjore kundër autoriteteve në nivel kombëtar e rajonal, duke kërkuar 100 milionë euro dëmshpërblim. Padia civile, paraqitur në një gjykatë të Romës, është ngritur kundër Kryeministrit Giuseppe Conte, Ministrit të Shëndetësisë Roberto Speranza dhe Guvernatorit të Rajonit të Lombardisë, Attilio Fontana. Italia, vendi i parë perëndimor i goditur nga koronavirusi, ka raportuar më shumë se 70,000 vdekje nga COVID-19 që pas shfaqjes së virusit në muajin shkurt, numri më i lartë në Evropë dhe i pesti më i lartë në botë. Rajoni më i goditur është Lombardia, ku pacienti i parë me COVID-19 u zbulua më 20 shkurt. Padia gjyqësore është ngritur nga anëtarët e një komiteti të quajtur "Noi Denunceremo", krijuar në prill për të përfaqësuar të afërmit e atyre që vdiqën në Bergamo, një nga qytetet më të prekura të Lombardisë. Sipas "Noi Denunceremo", kur shpërtheu virusi në Lombardi, autoritetet lokale dhe qeveria qendrore nuk arritën të ndërmarrin veprime të shpejta të cilat mund të kishin shmangur nevojën për një izolim kombëtar dhe dëmin ekonomik që pasoi. Ata gjithashtu pretendojnë për një mungesë gatishmërie, ku as Roma dhe as rajoni i Lombardisë nuk kishin një plan të azhornuar për të trajtuar një pandemi të mundshme. Në qershor "Noi Denunceremo" u kërkoi prokurorëve në Bergamo të hetonin përgjegjësinë e mundshme penale lidhur me mënyrën se si u menaxhua pandemia. Gjatë verës kryeministri Conte u mor në pyetje nga prokurorët në cilësinë e dëshmitarit, por nuk u vendos nën hetim penal. Pamjet: AFP