Etna ka dhënë spektakël natën e shkuar pasi për orë të tëra ka derdhur llavë dhe ka nxjerrë hi nga krateri jug lindor i saj. Reja e hirit është ngritur për rreth 8 km në qiell dhe është përhapur në pjesën perëndimore të Vullkanit. Instituti kombëtar i gjeofizikës dhe vulkanologjisë, ka konfirmuar se shpërthimi ishte mesatar dhe pasi arriti vlera të larta rreth orës 22, nisi të zbutej, duke kaluar në nivel mesatar. Autoritetet kanë lëshuar një alarm të kuq por aktiviteti i vullkanit nuk ka cënuar veprimtarinë e aeroportit ndërkombëtar të Katanias, që ndodhet aty pranë. Ishin tre rrjedhat e llavës nga krateri jug lindor, dy të parët kanë rrjedhur për disa qindra metra në drejtim të luginës Bove ndërsa rrjedha e tretë ishte e drejtuar në jug, duke përshkuar edhe ajo një distancë prej disa qindra metrash. Shpërthimi, shumë spektakolar, është parë nga disa rajone të sicilisë, nga katania në taormina e deri në ishujt Eolie.