Gjatë vizitës në Kosovë ditë më parë i dërguari amerikan, për Ballkanin Perëndimor, Gabriel Escobar, tha se e premtja është afati kur do të raportojë në Shtëpinë e Bardhë për procesin e uljes së tensioneve në veri. Ai i ka kërkuar Kosovës dhe Serbisë që të ndërmarrin hapat e nevojshëm pasi nga përgjigjet e marra dhe raportimi i të premtes në shtëpinë e bardhë, do të dilet me vendime. “Pas kësaj vizite, ne do të raportojmë në Shtëpinë e Bardhë, të premten, për të dhënë një përditësim mbi atë që po ndodh në Kosovë. Dhe unë duhet të raportoj nëse ka ndonjë progres apo jo. Miroslav Lajçak në anën tjetër, duhet të raportojë tek Josep Borrell, rreth situatës. Ky nuk është një afat apo një ultimatum, por një hap i radhës. Në bazë të raportit tim do të merren disa vendime dhe do të ecim përpara”, ka deklaruar ai. I dërguari amerikan për Kosovën dhe ai i BE-së, Miroslav Lajcak, qëndruan këtë javë në Prishtinë dhe Beograd, në një përpjekje të radhës për të ulur tensionet në veriun e Kosovës. Ndërsa nga prishtina, ata duket se u larguan të pakënaqur me qëndrimin e pakompromis të Kurtit, në Beograd deklaruan se vlerësonin gatishmërinë e presidentit serb, Aleksander Vucic, për të punuar për bindjen e serbëve të veriut që të marrin pjesë në zgjedhje.