Pas triumfit të 2018-tës, kur rrëmbeu cmimin e parë në festivalin e Sanremos së bashku me Fabrizio Moron, Ermal meta u rikthye në skenën e Aristonit, sërish si pretendent i fortë për fitore. “ Një milionë gjëra për të të thënë” titullohej kënga e thjeshtë, por shumë e pëlqyer e këngëtarit shqiptar, që rrëfente dashurinë e pastër, e i ftonte të gjithë të mos druhen t`i shprehin ndjenjat e tyre apo të kërkojnë ndihmë atëherë kur nevojitet. Pavarësisht mbështetjes së madhe të publikut, Ermali nuk arriti të shënonte të njëjtin sukses si tre vjet më parë. Italia, në këto kohë pandemia, duket se ka kthyer nga roku. Edicioni i 71-të i festivalit më të madh Italian të muzikës u fitua nga grupi Maneskin, me këngën ‘Zitti e buoni’, i vetmi në garë me muzikë rock. Mesazhi i tyre: mos u mërzit nga ata që flasin pa e ditur se c`thonë. Çmimin e dytë të festivalit të famshëm e rrëmbeu mes 26 finalisteve Francesca Michielin & Fedez, e i treti u rendit Ermal meta. Për të shpallur fituesin, hyri në lojë vota e tre jurive, teksa për shkak të pandemisë, edicioni i këtij viti u zhvillua pa prezencën e publikut.