Forcat turke e kanë vrarë liderin e supozuar të grupit të Shtetit Islamik (IS) gjatë një operacioni në Siri, tha presidenti i Turqisë, Recep Tayyip Erdogan. Presidenti Erdogan tha gjatë një intervistë për televizionin turk TRT se lideri i IS-it, i njohur si Abu Hussein al-Qurayshi, u vra në një sulm të kryer të shtunën. Erdogan tha se agjencia turke e inteligjencës, MIT, e kishte ndjekur atë për një kohë të gjatë. Turqia ka kryer operacione të shumta kundër IS-it dhe grupeve kurde përgjatë kufirit sirian, duke kapur ose vrarë militantë të dyshuar. Turqia kontrollon pjesë të mëdha territori në Sirinë veriore pas një serie sulmesh tokësore për të larguar grupet kurde nga kufiri turko-sirian. Abu Hussein al-Qurayshi u emërua udhëheqës i grupit militant pasi kreu i tij i mëparshëm u vra në tetor. Një zëdhënës i IS-it e quajti atë “një nga luftëtarët veteranë dhe një nga djemtë besnikë të Shtetit Islamik”. Ai mori drejtimin e ISIS-it në kohën kur grupi ekstremist ka humbur kontrollin e territorit që dikur mbante në Irak dhe Siri. Megjithatë, grupi ishte përpjekur të aktivizohej sërish, duke kryer disa sulme vdekjeprurëse në të dyja vendet. Themeluesi i ISIS-it, Abu Bakr al-Baghdadi, thuhet se është vrarë pasi u rrethua nga forcat amerikane në një sulm në veriperëndim të Sirisë në tetor të 2019-ës. Grupi shteti Islamik u shkëput nga Al Kaida rreth një dekadë më parë dhe arriti të shtinte nën kontroll pjesë të mëdha të Sirisë veriore dhe lindore, si dhe Irakun verior dhe perëndimor. Në 2014-ën, ekstremistët shpallën të ashtuquajturin kalifat, duke tërhequr mbështetës nga e gjithë bota. Vitet në vijim ata morën përsipër sulme të shumta, në të gjithë botën ndërkohë që më pas u vendosën vetë nën shënjestër. Në mars 2019, luftëtarët sirianë të mbështetur nga SHBA-ja morën kontrollin e pjesës së fundit të territorit që dikur mbanin ekstremistët, në provincën lindore të Sirisë, Deir el-Zour, që kufizohet me Irakun.