Policia ka shpallur në kërkim Danjel Pepajn si vrasësin e dy të rinjve në Malësinë e Madhe. Nëpërmjet një njoftimi policia ka deklaruar se 25 vjeçari Danjel Pepaj , banues në fshatin Vrith, Malësi e Madhe është shpallur në kërkim si vrasësi I dyshuar I Klement Pepaj 21 vjeç dhe Vilson Çutaj, 37vjeç. Danjel Pepaj akuzohet për veprat penale “Vrasja në rrethana cilësuese”, “Armëmbajtja pa leje” dhe “Kultivimi i bimëve narkotike”. Po këtë të premte është arrestuar nga policia, Rrok Pepaj, babai i Danjel Pepajt. Prej mbrëmjes së djeshme ai ndodhej në Drejtorinë e Policisë së Shkodrës i thirrur si dëshmitar i cili kishte dijeni për ngjarjen. Pas marrjes në pyetja nga ana e oficerëve, Rrok Pepajt i është komunikuar akuza “Kultivim i bimëve narkotike”, pasi dyshohet se në bashkëpunim me djalin e tij Danjel Pepaj, 25 vjeç, në fshatin Vrith, Malësi e Madhe janë personat që kanë kultivuar 29 bimët narkotike të gjetura në vendin e ngjarjes. Kujtojmë që ishte pikërisht Rrok Pepaj ai i cili ditën e enjte orientoi policinë drejt parcelave të kanabisit pranë fshatit Vrith, në Malësinë e Madhe, ku edhe u gjetën trupat e pajetë të Klement Pepaj dhe Vilson Çutaj. Dy të rinjtë dyshohet se janë vrarë nga Daniel Pepaj, pas një konflikti për kanabisin. Deri më tani motivi i kësaj ngjarje të rëndë dyshohet të jetë një sasi kanabisi e vjedhur nga Daniel Pepaj. Vilson Çutaj dhe Klement Pepajt ishin ekzekutuar me armë zjarri tip kallashnikov, ku trupi i Vilsoni ishte i bërë shosh nga plumbat. Ndërkohë Klement Pepaj kishte marrë disa plumba në shpinë. Në kërkim është Daniel Pepaj, autori i dyshuar i kësaj vrasje të dyfishtë.