Pas gati 600 ditësh qëndrimi në qendrën e paraburgimit në Hagë të Holandës, dy drejtuesit e Organizatës së Veteranëve të Luftës së Ushtrisë Çlirimtare të Kosovës Hysni Gucati dhe Nasim Haradinaj, do të mësojnë më 18 maj vendimin e marrë nga Dhomat e Specializuara të Kosovës, të njohura ndryshe si Gjykata Speciale. Gucati dhe Haradinaj akuzohen për vepra penale kundër administrimit të drejtësisë, për frikësim të dëshmitarëve, për hakmarrje dhe për shkelje të fshehtësisë së procedurës. Si Gucati, ashtu edhe Haradinaj, mund të dënohen me nga gjashtë vjet burgim, në rast se gjykata bindet nga hetimet e Zyrës së Prokurorit të Specializuar. Gjatë tërë procesit të gjykimit, prokuroria ka insistuar se ata kanë dëmtuar reputacionin e Gjykatës Speciale, si dhe të pengojnë punën e saj. Gjykata Speciale dhe Zyra e Prokurorit të Specializuar janë themeluar me vendim të Kuvendit të Kosovës në gusht të vitit 2015 për hetimin e krimeve të ish-pjesëtarëve të Ushtrisë Çlirimtare të Kosovës, të kryera kundër pakicave etnike dhe rivalëve politikë, nga janari i vitit 1998 deri në dhjetor të vitit 2000.