Shtetet e Bashkuara dhe Rusia filluan diskutime "të sinqerta dhe të drejtpërdrejta", me synimin për të ulur tensionet mes dy fuqive, ndërsa Presidenti rus Vladimir Putin vazhdon të mbajë të dislokuara rreth 100 mijë forca përgjatë kufirit ukrainas, tha Shtëpia e Bardhë. "Ekzistojnë dy drejtime që mund të marrë Rusia në këtë pikë, që mund të marrë Presidenti Putin", tha Sekretarja e Shtypit e Shtëpisë së Bardhë, Jen Psaki. "Ai mund të marrë rrugën e diplomacisë. Janë edhe dy raunde të tjera bisedimesh për këtë javë. I perceptojmë si një paketë prej tre takimesh, që mendoj se është edhe pozicioni i palës tjetër. Ose, ekziston shtegu i përshkallëzimit. Kemi sigurisht shpresën se rruga drejt diplomacisë do të jetë drejtimi që ata do të zgjedhin".Asnjëra nga palët nuk e përshkroi takimin si një dështim total, por as nuk ofruan ndonjë perspektivë për të lehtësuar ngërçin gjithnjë e më shqetësues për rritjen e pranisë ushtarake ruse në kufirin me Ukrainën, që Perëndimi e percepton si një kërcënim thelbësor ndaj sigurisë evropiane. Nuk pati sidoqoftë as ndonjë tregues për ndonjë lëvizje nga pozicionet për sa i përket çështjeve ndoshta më pak urgjente që kanë rënduar marrëdhënien SHBA - Rusi. Zëvendës Sekretarja amerikane e Shtetit Ëendy Sherman, që kryeson delegacionin amerikan tha pas bisedimeve që zgjatën tetë orë se Shtetet e Bashkuara i kishin hedhur poshtë me vendosmëri propozimet ruse të sigurisë gjatë bisedimeve me homologun e saj rus në Gjenevë dhe shtoi se Uashingtoni nuk do të lejojë askënd të bllokojë politikën e dyerve të hapura të NATO-s. ndërsa zëvendësministri i jashtëm rus, Sergei Riabkov, tha para gazetarëve: "Për fat të keq kemi dallime të mëdha në qëndrimet tona parimore në këtë drejtim. Shtetet e Bashkuara dhe Rusia kanë pikëpamje të kundërta për atë që duhet bërë për disa çështje”.