Temperaturat kanë pësuar një rënie të ndjeshme në të gjithë vendit, ndërsa në zonat verilindore dhe në lartësitë mbi 1 mijë metra mbi nivelin e detit janë raportuar edhe reshje dëbore, që në disa zona ka arritur në trashësi 15 deri në 20 centimetra. Këto janë pamjet që vijnë nga fshati Novosej në njësinë administrative të Shishtavecit në Kukës. Njësitë administrative të thella si Shishtaveci, Zapoti, Topojani, Gryk-Qaji, Arreni dhe Kalisi janë zbardhur nga bora, duke sjellë një pamje të vërtetë dimërore. Deri para mesditës së të enjtes nuk janë raportuar probleme në qarkullim apo furnizim. Drejtuesit e mjeteve këshillohen të tregojnë kujdes gjatë lëvizjes, për shkak të lagështisë dhe mundësisë së akullit në rrugë. Reshje dëbore janë raportuar edhe në zonat malore të Peshkopisë dhe në Bulqizë.