Dhjetëra Tesla u dogjën në Francë në atë që autoritetet po e trajtojnë si një sulm me zjarrvënie, tha zyra e prokurorit. Një hetim është hapur për sulmin e të dielës mbrëma në një koncencionar pranë qytetit jugor të Tuluzës ku u shkrumbuan tetë makina. Katër makina të tjera u dëmtuan rëndë ndërkohë që zyrtarët thanë se flakët nuk ishin aksidentale. Zjarrfikësit e mbërritur në vendngjarje konstatuan se zjarri ishte i qëllimshëm dhe se ishin shënjestruar vetëm makinat dhe jo ambjentet e koncencionarit. Një numër aktesh që kanë patur në shënjestër Teslan janë regjistruar në evropë që kur Elon Musk, pronari i teslas, u afrua me presidentin amerikan Donald Trump dhe mbështeti partitë evropiane të ekstremit të djathtë. Madje shitjet e makinave Tesla janë përgjysmuar në janar 2025 në Gjermani dhe Francë. Në dy muajt e fundit, miliarderi Elon Musk ka mbështetur dhe promovuar partinë e ekstremit të djathtë të Gjermanisë në dhjetëra postime në platformën e tij X, ka biseduar me lidere e saj dhe u ka thënë 219 milionë ndjekësve të tij se AFD ishte "shpresa e vetme" për Gjermaninë. Megjithatë, mbështetja e Musk për AFD luajti pak rol në rezultatin mahnitës të vendit të dytë të partisë në zgjedhjet e 23 shkurtit. CEO i Tesla-s madje nuk është ndalur me kaq por ka vazhduar të promovojë kauzat e krahut të djathtë në të gjithë Evropën. Ndërsa ndikimi më i dukshëm, deri më tani, duket se është dëmtimi i markës së Tesla-s, analistët thonë se ai mund të ketë një objektiv afatgjatë për perandorinë e tij të biznesit: mbështetjen e partive politike që mund të rrëzojnë rregulloret që ai mendon se pengojnë inovacionet teknologjike. E ndërsa ndikimi i Musk në politikën evropiane është i paqartë, aktivizmi i tij duket se po dëmton Teslën, shitjet e së cilës kanë rënë në evropë jashtëzakonisht shumë.