Për të mësuar nëse arrestimi i Ilir Metës është fundi i tij politik do të duhen muaj, ndoshta edhe vite. Por e sigurt është që prangosja e kreut të Partisë së Lirisë me urdhër të prokurorëve, Altin Dumani, Sotir Kllapi dhe Erjon Çela është momenti më i ulët në karrierën politike të Ilir Metës në tre dekada. Meta u anëtarësua në Partinë Socialiste në vitin 1991, teksa kjo po përpiqej të reformonte dhe distanconte veten nga e shkuara komuniste. Një vit më pas, në moshën 23 vjeçare u zgjodh deputet. Pasi socialistët fituan zgjedhjet e parakohshme të 1997, Meta u caktua Sekretar i Shtetit për Integrimin Europian. Ai u caktua zv.kryeministër dhe ministër i koordinimit të qeverisë në tetor 1998. Vetëm një vit më pas, Meta përfitoi nga përçarjet brenda partisë së tij se kush duhet ta pasonte kryeministrin e përkohshëm Pandeli Majko. Në nëntor 1999, vetëm 30 vjeç, u bë Kryeministër. Pak vite më vonë u përplas me Fatos Nanon dhe u shkëput nga PS për të krijuar LSI-në, parti me të cilën fiton pesë mandate në zgjedhjet e 2005, të fituara nga PD.