Pas përfundimit të seancës së parë gjyqësore për dosjen ‘Partizani’, Jamarbër Malltezi deklaroi për gazetarët jashtë ambienteve të GJKKO, se ndaj tij është ngritur një proces i pastër politik, i mbushur me dhjetëra shkelje procedurale dhe falsifikime. Ai theksoi se aktakuza është mbajtur e fshehur për tre vite dhe se emrat e të hetuarve janë fshehur qëllimisht për të shmangur të drejtat e tyre ligjore. Malltezi përmendi gjithashtu gjyqtaren Irena Gjoka duke thënë se mbrohet nga Edi Rama dhe përdoret si kamikaze për të luftuar opozitën. Po ashtu Malltezi hodhi akuza ndaj KLGJ dhe Prokurorisë së Përgjithshme për rastin e Irena Gjokës duke theksuar se vendimi i dënimit të Irena Gjokës nuk ka dyshime. “U përmend fakti që delinkuentja Irena Gjoka mbrohet me një kokëfortësi të çuditshme nga Rama, është përdorur si kamikaze për të luftuar opozitën. Vendimi i dënimit të Irenës nuk ka dyshime. KLGJ nuk vepron. Prokuroria e Përgjithshme fshihet pas gishtit”, tha Malltezi ndër të tjera.