Kompania daneze Clever po provon diçka që beson se është vërtet e zgjuar: ka hequr dorë nga shefat për të nxitur kreativitetin dhe për të rritur performancën e grupit. Në selinë e saj në Kopenhagen, në një ish-lagje industriale, operatori kryesor i stacioneve të karikimit të makinave elektrike në Danimarkë nuk ka struktura organizative hierarkike. Në vend të kësaj, kompania ka grupe të vetë-menaxhuara, ku çdo punonjës është pjesë e procesit të vendimmarrjes dhe përgjegjës për zbatimin e vendimeve. Casper Kirketerp-Moller bashkëthemeloi kompaninë në vitin 2012 me vetëm disa punonjës. Danimarka dhe vendet e tjera nordike kanë mbështetur prej kohësh modelet sociale të barazisë dhe hierarkitë e sheshta të biznesit. Por Kirketerp-Moller donte t'i çonte gjërat një hap më tej, duke menduar se mund të bënte më mirë se mënyra tradicionale. "Isha shumë i dhënë pas mënyrës se si punojmë ne njerëzit së bashku, çfarë kulture biznesi na duhet", shpjegoi ai. Clever u rrit me kalimin e viteve dhe në 2019 Kirketorp-Moller filloi të ndryshonte gradualisht modelin e biznesit të kompanisë për të hequr qafe menaxhimin e mesëm dhe madje edhe rolin e tij si CEO. Për të, gjëja më e rëndësishme ishte të zhbllokonte potencialin e secilit punonjës, veçanërisht e rëndësishme kjo në epokën e inteligjencës artificiale.