Një dallgë masive 'megatsunami' e krijuar kur një pjesë e një mali të Alaskës u shemb në det është e dyta më e madhja e regjistruar ndonjëherë, dhe një kujtesë për rreziqet që paraqet shkrirja e akullnajave, thonë shkencëtarët. Verën e kaluar një dallgë gjigante përshkoi një fjord të largët në juglindje të Alaskës duke lënë pas shkatërrim. Ngjarja nuk u raportua në atë kohë, por një analizë e re shkencore tregon se dallga u shkaktua nga një rrëshqitje masive toke. 64 milionë metra kub shkëmb, ekuivalent i 24 Piramidave të Mëdha, ranë në ujë. Fuqia e kësaj sasie shkëmbi që u zhyt në fjord në më pak se një minutë krijoi një dallgë gjigante pothuajse 500 metra të lartë. Vetëm koha kur ndodhi, në orët e para të mëngjesit, parandaloi shkatërrimin e anijeve turistike, thonë studiuesit. Dr Bretëood Higman, një gjeolog i Alaskës, i cili pa vetë dëmet në Fjordin Tracy Arm, tha se ishte "i tronditur". 'Jam shumë i tmerruar se nuk do të jemi kaq me fat në të ardhmen', thotë ai. Këto dallgë të mëdha, të etiketuara si megatsunami, ndodhin kur një rrëshqitje dheu e shkaktuar nga një tërmet ose shkëmb i shembur godet ujin. Ato zakonisht lokalizohen dhe zhduken shpejt. Lloji tjetër i cunamit ndodh në oqean të hapur dhe shkaktohet drejtpërdrejt nga tërmetet, ose herë pas here nga ngjarje të tjera të fuqishme siç janë vullkanet nënujore. Ato, ashtu si cunami i Japonisë i vitit 2011, mund të udhëtojnë për mijëra milje, duke goditur zonat e populluara dhe duke shkaktuar shkatërrime të gjera dhe humbje jetësh.