Zyrtarë dhe ekspertë në Argjentinë po përpiqen të përcaktojnë nëse pikërisht ky vend është burimi i shpërthimit të hantavirusit që shpërtheu në një anije turistike në Atlantik, në mesin e raporteve se disa pasagjerë tashmë janë kthyer në vendet e tyre. Argjentina, nga ku nisi udhëtimi drejt Antarktidës, renditet vazhdimisht nga Organizata Botërore e Shëndetësisë si vendi me incidencën më të lartë të kësaj sëmundjeje të rrallë të përhapur nga minjtë në Amerikën Latine. Hetuesit po punojnë për të gjurmuar burimin e infektimit. Ministria argjentinase e shëndetësisë raportoi së fundi 101 raste të hantavirusit që nga qershori 2025, që është sa dyfishi it ë njëjtës periudhë të vitit të kaluar. Një hantavirus i gjetur në Amerikën e Jugut, i quajtur virusi Andes, mund të shkaktojë një sëmundje të rëndë dhe shpesh fatale të mushkërive, të njohur ndryshe si sindroma pulmonare e hantavirusit. Autoritetet vendase të shëndetësisë thonë se kjo sëmundje ka shkaktuar vdekje në pothuajse një të tretën e rasteve të regjistruara këtë vit. Raportet tregojnë se pasagjerët e infektuar në anijen MV Hondius testuan pozitiv për virusin Andes. Tre prej tyre kanë vdekur, një është në kujdes intensiv në një spital në Afrikën e Jugut, dhe tre të tjerë u evakuan nga anija të mërkurën. Një tjetër burrë që ishte larguar më herët nga anija, testoi pozitiv në Zvicër. Infektimi me hantavirus zakonisht ndodh përmes kontaktit me minj të infektuar, urinë, jashtëqitje ose pështymë, dhe transmetimi nga njeriu te njeriu konsiderohet i rrallë. Megjithatë, një përhapje e kufizuar midis kontakteve të afërt është vënë re në disa shpërthime të mëparshme të virusit Andes.