Një raport paraprak ka hedhur dritë mbi motivet e mundshme të personit të akuzuar për të shtënat me armë zjarri ndaj Presidentit Donald Trump gjatë Darkës së Shoqatës së Korrespondentëve të Shtëpisë së Bardhë pak ditë më parë. Sipas një analize të përgatitur nga Zyra e Inteligjencës e Departamentit të Sigurisë Kombëtare, i dyshuari Cole Thomas Allen, 31 vjeç, mund të jetë nxitur pjesërisht nga qëndrimet e tij ndaj konfliktit mes SHBA-së dhe Iranit. Raporti, i datuar më 27 prill, dy ditë pas incidentit, sugjeron se lufta disa mujore me Iranin “mund të ketë kontribuar në vendimin e tij për të kryer sulmin”. Analiza mbështetet në postime të Allen në rrjetet sociale, ku ai shprehte kritika të forta ndaj politikave amerikane. Autoritetet amerikane kanë dhënë pak detaje zyrtare mbi motivet, por një manifest prej rreth 1,000 fjalësh, i shkruar nga i dyshuari para sulmit, tregon se ai kishte qëndrime ekstremisht negative ndaj Trump dhe synonte vrasjen e Presidentit dhe anëtarëve të kabinetit të tij. Në dokument, ai përjashtonte nga shënjestra drejtuesin e Federal Bureau of Investigation, Kash Patel, si dhe mysafirët dhe forcat e rendit, për aq kohë sa nuk ndërhynin. Prokurorët kanë deklaruar se Allen “nuk ishte dakord” me politikat e administratës Trump dhe synonte të “kundërsulmonte” vendimet që i konsideronte moralisht të papranueshme. Ai përballet me disa akuza të rënda, përfshirë tentativë vrasjeje të Presidentit, përdorim të armës së zjarrit gjatë një krimi të dhunshëm dhe transport të paligjshëm të armëve dhe municioneve përtej kufijve shtetërorë. Gjithashtu, ai akuzohet se ka qëlluar ndaj një agjenti të Shërbimit Sekret gjatë përpjekjes për të hyrë në zonën e sigurisë së eventit. Hetuesit po analizojnë aktivitetin e tij në rrjetet sociale, përfshirë platformën Bluesky, ku ai kishte publikuar mesazhe kundër Trump, Elon Musk dhe politikave ndërkombëtare, përfshirë pushtimin rus të Ukrainës. Në një nga postimet, Allen kishte bërë thirrje për shkarkimin e Trump pasi ky i fundit kishte përdorur retorikë të ashpër ndaj Iranit. Në një tjetër postim të vitit 2024, ai e përshkruante Trump si “djalli”. Ndërkohë, gjatë procedurave gjyqësore, gjykatësi federal Zia Faruqui kërkoi falje për mënyrën se si ishte trajtuar i pandehuri në paraburgim. Ai kritikoi kushtet e ashpra të ndalimit, duke përfshirë vendosjen e Allen në masa kufizuese ekstreme dhe mbikëqyrje për vetëvrasje, pavarësisht mungesës së një të kaluare kriminale. “Është shqetësuese që një person pa precedent penal të trajtohet në këtë mënyrë”, deklaroi Faruqui. Gjykatësi urdhëroi autoritetet e burgut në Uashington DC të japin shpjegime mbi kushtet e mbajtjes së Allen dhe të shqyrtojnë kërkesat e tij për trajtim më të përshtatshëm.