Shqipëria ka shënuar shifra tragjike të humbjes së jetëve nga koronavirusi. Në harkun e 24 orëve të fundit kanë humbur jetën 18 persona, ndërsa janë shënuar edhe 645 raste të reja infektimesh. Rastet në numër më të larta janë në Tiranë, e më pas në Durrës e Fier. Raste në rritje ka edhe në zona, që deri në fillim të muajit shtator kanë pasur nën 10 raste infektimesh. Gjithsesi, shifrat zyrtare raportojnë edhe për shumë qytetarë që e kanë fituar betejën me covid 19. Në 24 orët e fundit janë shëruar 403 qytetarë, duke e çuar në total në 17 mijë e 755 të shëruar që nga fillimi i epidemisë. Aktualisht në 3 spitalet COVID, po trajtohen 463 pacientë, 25 në terapi intensive dhe 8 pacientë të intubuar. Ministria, nisur nga shifrat e larta të jetëve të humbura, por edhe të rasteve të rënda që ndodhen në terapi intensive u drejton një apel të gjithë qytetarëve që të bashkëpunojnë në kufizimin e përhapjes së infeksionit, duke respektuar rregullat, duke mbajtur maskën, duke shmangur grumbullimet, duke ruajtur distancën dhe higjienën. Mjekët kërkojnë gjithashtu që për çdo shenjë të sëmundjes duhet kontaktuar mjekun i familjes.