Kurba e të infektuarve me koronavirus në Republikën Çeke është rrafshuar, edhe pse spitalet janë të ngarkuara dhe vihet re një shtim I infektimeve tek të moshuarit. Numri i rasteve të reja ditore u rrit tri herë duke mbërritur në mbi 15,000 që në 23 tetor, por prej tre ditësh është në rënie njoftoi ministria vendase e shëndetësisë. Sipas saj, numri i riprodhimit "R" ka rënë në rreth 1, duke sugjeruar një gjendje të stabilizuar. “situata epidemiologjike eshte e qëndrueshme, por sigurisht ne ende nuk kemi fituar”, tha ministri i Shëndetësisë, Jan Blatny, në një konferencë për shtyp. “Parashikimet tona tregojnë se do të vazhdojmë të shohim midis 12,000 dhe 15,000 raste pozitive në ditë”, shtoi ai. Spitalet kanë anuluar gati të gjitha procedurat jourgjente dhe disa është dashur të fillojnë transferimin e pacientëve në rajone të tjera.Megjithatë, Ladislav Dusek, kreu i institutit të të dhënave shëndetësore UZIS, pohoi për agjencinë e lajmeve Reuters se skenari më i keq, ai i të mbingarkuara, nuk është materializuar. Në total, Çekia ka regjistruar gati 392,000 raste me koronavirus dhe 4,330 viktima. Qeveria ka mbyllur shkollat, restorantet dhe shumicën e pikave të shitjes me pakicë dhe ka vendosur ndalim qarkullimin natën, për të kufizuar përhapjen e infeksionit.