Pas padisë në Kolegjin Zgjedhor kundër vendimit të Komisionit Rregullator për certifikimin e rezultatit të 11 majit, është caktuar data dhe trupa gjykuese që do të shqyrtojë çështjen. Pas hedhjes së shortit, relatore është zgjedhur Lutfije Celami, teksa anëtarë janë Entela Shedula, Alma Kodraliu, Ornela Naqellari dhe Enkel Peza Po ashtu mësohet se data 4 shtator është caktuar për mbajtjen e seancës në orën 10:00. Koalicioni Partia Demokratike Aleanca për Shqipërinë Madhështore, pas mosnjohjes së zgjedhjeve, ankimoi edhe vendimin e komisionit rregullator, për certifikimin e zgjedhjeve. Duke sjellë raste të ndryshme të parregullsive në zgjedhje nëpërmjet videove dhe dokumenteve si dhe raportin e OSBE-ODIHR për parregullsitë e konstatuara, demokratët kërkojnë zhbërjen e vendimit të rregullatorit dhe mosçertifikimin e rezultatit. Edhe vetë seanca në Komisionin Rregullator u zhvillua me debate, ku anëtarët nga opozita sollën argumente pse nuk duhej certifikuar rezultati. Në përfundim të seancës, me 3 vota pro e një kundër Rregullatori certifikoi rezultatin e dalë nga 11 maji.