Kur Daniela Vicino nisi punën si mësuese në Sicili, klasa e saj kishte deri në 30 fëmijë. Me uljen e lindshmërisë, ky numër gati është përgjysmuar. Tani klasa ka maksimumi 18 deri 20 fëmijë, në disa raste 15 apo 16. Dhe kjo sipas saj, është shumë e dhimbshme. Prej kohësh Italia ka një nga shkallët më të ulta të lindshmërisë në Evropë, por kjo është përkeqësuar edhe nga pandemia e koronavirusit, dhe tashmë problem nuk janë vetëm maternitetet bosh. Vitin e shkuar, popullsia e Italisë u tkurr me gati 400 mijë – pak a shumë sa popullsia e qytetit të Firences – duke shkuar në 59.3 milionë, teksa vdekjet arritën kulmin, lindjet pikën më të ulët, kurse imigracioni u pakësua. Ekspertët paralajmërojnë se, më pak fëmijë sot, do të thotë më pak taksapagues nesër, gjë që do ta bënte cdo vend më pak produktiv dhe më të paaftë për të mbuluar nevojat e një popullsie në plakje. Ky fakt ka shqetësuar prej kohësh të gjitha shoqëritë e Perëndimit, por është akoma më I rëndë për Italinë, ekonomia e së cilës, është më e dobëta e vendeve të G7-ës. Sakaq, kryeministri Mario Draghi ka premtuar më shumë cerdhe fëmijësh, ndihma për nënat që janë në punë, si dhe kredi për ciftet e reja, në kuadrin e planit prej 221 miliard eurosh të BE-së për rimëkëmbjen nga pandemia. Në 2012 Italia arriti pikën më të ulët të lindshmërisë që nga krijimi I shtetit në vitin 1861, me 534 mijë lindje. Që atëherë, ky rekord I ulët është thyer gati cdo vit. Në 2020, ky numër ra në 404 mijë për shkak të koronavirusit, me një rënie të pritshme në 384 mijë për vitin 2021, prej situatës post-Covid.