Elon Musk ka reaguar ashpër ndaj Bashkimit Europian përmes postimeve në X, pas gjobës prej 120 milionë eurosh ndaj platformës së tij të rrjeteve sociale për shkelje të rregullave të transparencës. “Bashkimi Europian nuk është një Demokraci, por më tepër një burokraci e burokratëve të pazgjedhur”, shkroi Musk në një postim të fundit. Ai gjithashtu ripostoi mesazhin e një përdoruesi tjetër, i cili shkruante: “Është për të qeshur të lexosh të gjitha këto postime nga europianët që u thonë qytetarëve amerikanë të mos ndërhyjnë në politikën europiane. Këta janë të njëjtët europianë që kanë kaluar çdo moment të dekadës së fundit duke folur në mënyrë obsesive kundër Trump!”, duke shtuar mbi postim: “E vërtetë, ka kaq shumë politikanë në Europë që janë tradhtarë të popullit të tyre”. Reagimi i Musk vjen pasi Komisioni Europian humbi qasjen në panelin e reklamave të X, pas vendosjes së gjobës ndaj platformës për shkelje të Ligjit për Shërbimet Dixhitale, i cili ka si qëllim kufizimin e përhapjes së përmbajtjeve të paligjshme. Drejtori i produkteve të X, Nikita Bier akuzoi Komisionin Europian se kishte tentuar të promovonte postimin e tij mbi gjobën ndaj X, duke përfituar nga një dobësi e sigurisë së platformës për të publikuar një link që mashtron përdoruesit për të rritur në mënyrë artificiale përhapjen e tij.