Autoritetet indiane urdhëruan një hetim dhe ofruan kompensim për viktimat të dielën pasi një zjarr përfshiu një klub nate në shtetin perëndimor të Goas, duke vrarë 25 persona. "Kam urdhëruar një hetim gjyqësor për të gjithë incidentin për të identifikuar shkakun dhe për të përcaktuar përgjegjësinë" për zjarrin, shkroi Kryeministri i shtetit në X, duke thënë se gjashtë persona të plagosur ishin në gjendje të qëndrueshme dhe po merrnin kujdes mjekësor. Kryeministri indian Narendra Modi tha se kishte folur zyrtarët lokalë dhe u shprehu ngushëllime familjeve të viktimave. Modi shkroi në X se zyra e tij do të ofronte kompensim deri në 200,000 rupi ose 2,200 dollarë, për secilën familje të viktimave dhe 50,000 rupi për të plagosurit. Policia u njoftua për flakët në klub pak minuta pas mesnate, tha shefi i policisë së Goas. Autoritetet punuan gjatë gjithë natës për ta vënë zjarrin nën kontroll dhe të gjithë trupat janë gjetur. Imazhet në mediat lokale dhe ato sociale treguan zjarrfikës që shuanin flakët dhe ambulanca të mbledhura përreth. Të paktën katër nga viktimat ishin turistë dhe 14 ishin staf i klubit, tha policia.