Sekretari amerikan i Mbrojtjes, Pete Hegseth tha se sheh zhvillime pozitive në shpenzimet për mbrojtje në Gjermani dhe lëvdoi aleatët e NATO-s për rritjen e buxheteve për ushtritë e tyre. Duke folur në një forum për mbrojtje në Kaliforni, Hegseth mirëpriti marrëveshjen e NATO-s për të rritur ndjeshëm shpenzimet në mbrojtje në vitet në vijim. “Aleatët që shërbejnë si shembuj, sikurse Izraeli, Koreja e Jugut, Polonia, Gjermania çdo ditë e më shumë, shtetet baltike dhe të tjerë, do të pranojnë trajtim special nga ne”, deklaroi ai. Sipas tij, Shtetet e Bashkuara presin kontribute të ngjashme edhe nga aleatët e tjerë, dhe ata që dështojnë t’i përmbushin obligimet e tyre mund të përballen me pasoja. Marrëveshja e vendeve të NATO-s, e arritur në qershor parashikon që vendet anëtare të shpenzojnë të paktën 3.5 për qind të bruto prodhimit të brendshëm në mbrojtje, plus 1.5 për qind në projekte të lidhura me mbrojtjen, siç është infrastruktura. Deri më 2035, shpenzimet në këtë sektor pritet të arrijnë në 5 për qind të GDP-së, njëherësh shifra më e lartë prej Luftës së Ftohtë.