Një mburojë përmbi reaktorin bërthamor të Çernobilit në Ukrainë nuk mund të kryejë më funksionin e saj kryesor pas një sulmi me dron që u regjistrua më herët gjatë këtij viti, sipas Agjencisë Ndërkombëtare për Energji Bërthamore. Inspektorët kanë zbuluar se struktura masive, e vendosur mbi reaktor pas katastrofës së vitit 1986 e ka humbur funksionin primar, përfshirë “aftësinë e izolimit”. Në shkurt, Ukraina akuzoi Rusinë se kishte shënjestruar centralin, pretendim që Kremlini e hodhi poshtë. Agjencia Ndërkombëtare për Energji Bërthamore, agjenci e Kombeve të Bashkuara, tha se riparimet janë “thelbësore” për të “parandaluar degradimin e mëtejshëm” të mburojës. Megjithatë ekspertët thonë se nuk ka arsye për panik. Sipas tyre, rreziku është “i ulët”, sepse pluhuri i kontaminuar bllokohet nga një "sarkofag" i trashë betoni, i cili është i mbuluar nga mburoja tjera. Si pasojë e një shpërthimi të vitit 1986 në Çernobil, në ajër ka rrjedhur sasi e madhe materiali radioaktiv, duke nxitur emergjencë shëndetësore në një pjesë të mirë të Evropës. Si përgjigje, Bashkimi Sovjetik i atëhershëm ndërtoi një sarkofag, arkë prej guri, mbi reaktorin bërthamor. Megjithatë, ajo mburojë ka pasur një jetëgjatësi prej 30 vjetësh, duke nxitur nevojën për një mburojë shtesë për të parandaluar rrjedhjen e materialit radioaktiv në 100 vjetët e ardhshëm.