Agjencia Ndërkombëtare e Energjisë Atomike thotë se kupola gjigante e vendosur mbi centralin bërthamor të Çernobilit në Ukrianë nuk është më në gjendje të mbajë të izoluar materialin radioaktiv pas një sulmi me dron në fillim të këtij viti. Sipas BBC, Inspektorët e Agjencisë Ndërkombëtare të Energjisë Atomike zbuluan se struktura masive, kupola e madhe prej çeliku që mbulon reaktorin e shkatërruar, e ndërtuar mbi vendin e katastrofës bërthamore të vitit 1986, kishte humbur "funksionet e saj parësore të sigurisë, përfshirë aftësinë e izolimit". Në shkurt, Ukraina akuzoi Rusinë për shënjestrimin e termocentralit, një pretendim që Kremlini e mohoi. Agjencia Ndërkombëtare e Energjisë Atomike rekomandon rinovim të thellë të kupolës kolosale, vendosur disa vite më parë për të lejuar operacionet e pastrimit dhe për të garantuar sigurinë e zonës, pothuajse 40 vjet pas katastrofës më të madhe bërthamore në histori. “Janë kryer disa riparime të përkohshme në çati, por restaurimi i plotë dhe i shpejtë është thelbësor për të shmangur degradimin e mëtejshëm dhe për të garantuar sigurinë afatgjatë bërthamore”, deklaroi drejtori i përgjithshëm i IAEA-s, Rafael Grossi. Ai shtoi se strukturat mbajtëse të NSC-së dhe sistemet e monitorimit nuk kanë pësuar dëmtime të përhershme. Që nga fillimi i dhjetorit, organi mbikëqyrës bërthamor i OKB-së ka vlerësuar infrastrukturën energjetike të Ukrainës, ndërsa vendi vazhdon të mbrohet kundër Rusisë. Përveç vlerësimit të Çernobilit, agjensia ka inspektuar nënstacionet elektrike të lidhura me sigurinë dhe mbrojtjen bërthamore.