Dy anije u goditën nga dronë pranë bregdetit bullgar të Detit të Zi dhe njëra prej tyre u fundos, incidenti i dytë i këtij lloji brenda një jave, deklaroi të martën kryeministri Rumen Radev. Anija "Chelsea 3", në pronësi ukrainase dhe që lundronte nën flamurin maltez, u godit nga tre dronë dhe pësoi dëmtime rreth 33 km larg bregdetit bullgar, tha Radev. Ekuipazhi i saj – shtatë ukrainas dhe tetë azerbajxhanas – u shpëtua. Pesë anëtarë të ekuipazhit morën ndihmë mjekësore, por askush nuk pësoi lëndime të rënda. Gjithashtu u shpëtua një anëtar i ekuipazhit të anijes së fundosur, shtoi Radev. "Kjo është absolutisht e papranueshme – një tjetër sulm në afërsi të menjëhershme të ujërave territoriale bullgare," tha Radev në një deklaratë televizive. "Kam planifikuar të bisedoj me Sekretarin e Përgjithshëm të NATO-s, Mark Rutte për këtë". Radev tha se nuk kishte prova të qarta se kush e kreu sulmin, por "rezultati i shërben interesave të Federatës Ruse", duke shtuar se do të thërriste ambasadorin rus lidhur me incidentin. Bullgaria nuk kufizohet as me Ukrainën dhe as me Rusinë, por si anëtare e NATO-s ajo zë një pozicion strategjik në Detin e Zi, ku të dyja vendet kanë porte të rëndësishme. Ekzistojnë shqetësime në rritje lidhur me sulmet hibride me dronë nga ana e Rusisë, ndërsa ajo vazhdon luftën në Ukrainë.