Kryeministri britanik Keir Starmer është bërë lideri i parë evropian që thotë se është gati të vendosë trupa paqeruajtëse në Ukrainë, duke e marrë këtë angazhim përpara një takimi urgjent të liderëve në Paris për të diskutuar rolin e Evropës në një armëpushim. Presidenti i SHBA-së, Donald Trump, habiti Ukrainën dhe aleatët evropianë javën e kaluar kur njoftoi se kishte zhvilluar një bisedë telefonike me presidentin rus Vladimir Putin pa u konsultuar me ta për të diskutuar për fundin e luftës tre-vjeçare. I dërguari i Trump për Ukrainën, Keith Kellogg, tha të shtunën se Evropa nuk do të ketë një vend në tryezë për asnjë bisedë paqeje. Uashingtoni në anën tjetër dërgoi një pyetësor në kryeqytetet evropiane për të pyetur se si mund të kontribuojnë ato në garancitë e sigurisë për Kievin. Starmer, i cili pritet të udhëtojë në Uashington për t'u takuar me Trumpin javën e ardhshme, tha të dielën se Evropa po përballet me një "moment historik" për sigurinë kolektive të kontinentit dhe ajo duhet të punojë ngushtë me Shtetet e Bashkuara. Ai tha se Britania ishte e gatshme të luante një rol udhëheqës në dhënien e garancive të sigurisë për Ukrainën, duke përfshirë gatishmërinë për të vendosur "trupat britanike në terren nëse është e nevojshme". “Fundi i kësaj lufte, kur të vijë, nuk mund të jetë thjesht një pauzë e përkohshme përpara se Putin të sulmojë përsëri”, tha ai në gazetën Daily Telegraph. Presidenti francez Emmanuel Macron do të presë ndërkohë liderët nga Gjermania, Italia, Britania, Polonia, Spanja, Holanda dhe Danimarka, të cilët do të përfaqësojnë vendet baltike dhe skandinave, së bashku me udhëheqjen e Bashkimit Evropian dhe Sekretarin e Përgjithshëm të NATO-s, Mark Rutte.