Bashkimi Evropian ka prezantuar planet eventuale në rast se dështojnë bisedimet me Britaninë e Madhe për të arritur marrëveshje pas Brexitit. Planet synojnë të sigurojnë lidhje bazike tokësore dhe ajrore mes Britanisë dhe Bashkimit Evropian, si dhe të lejojnë mundësinë e peshkimit në ujërat e njëra-tjetrës. Këto plane vijnë pasi bisedimet në mes të kryeministrit britanik, Boris Johnson dhe shefes së BE-së, Ursula von der Leyen kanë përfunduar pa marrëvshje. Mbretëria e Bashkuar pritet të ndalojë së aplikuari rregullat për tregti të BE-së më 31 dhjetor të këtij viti. Mbretëria e Bashkuar është larguar nga blloku evropian në janar të vitit 2020, mirëpo një periudhë tranzitore 11-mujore u ka mundësuar të dyja palëve që të negociojnë për marrëveshje. Bisedimet janë duke vazhduar, ndonëse Zyra e kryeministrit britanik ka thënë pas bisedimeve të ditës së mërkurë se mes qëndrimeve të liderëve ka "dallime të thella".Sekretari i Jashtëm britanik, Dominic Raab ka thënë se bisedimet mund të mos zgjasin përtej ditës së diel. Vendimi për largim të Britanisë nga BE-ja ka ardhur pasi 52 për qind e votuesve kanë votuar për dalje të Britanisë nga BE-ja kundruall 48 për qind që kanë kundërshtuar atë, në referendumin e mbajtur më 2016. Nëse asnjë marrëveshje nuk arrihet, atëherë udhëtarët nga britania e madhe mund të ndalohen të hyjnë në BE nga 1 janari pasi rregullat e udhëtimit të lidhura me qënien pjesë e BE skadojnë dhe kufizimet për shkak të pandemisë, ndalojnë hyrjen. Si pasojë nuk do të aplikohet më automatikisht udhëtimi pa kufizime për britanikët.