Të paktën katër persona humbën jetën një ditë më parë kur metropoli turk, Stambolli u godit nga një stuhi e ashpër me erëra të forta. 38 persona të tjerë ndërkohë janë lënduar. Që nga ora 8.30 minuta e pasdites, mbi 1500 telefonata i janë bërë shërbimit të emergjencave në stamboll për shkak të struhisë. Shërbimet e emergjencave kanë punuar ethshëm për të ndihmuar njerëzit në nevojë. Që nga mëngjesi i të hënës, qyteti me mbi 15 milionë banorë, është përballur me erërat e forta që kanë shkulur pemë me rrënjë, kanë rrëzuar catitë e shtëpive e madje rrëzuan edhe një kullë sahati. Zyrtarët e motit thanë se era arriti shpejtësinë e 129 kilometrave në orë në distriktin Beylikduzu që u përball madje edhe me një shi balte gjatë stuhisë.Disa anije të ankoruara në Maltepe dhe Pendik pësuan dëme të rënda për shkak të stuhisë që po ashtu bëri që një anije mallrash të përplasej me molin në portin Ambarli. Në mesin e stuhisë, autoritetet morën masa parandaluese duke ndaluar transportin ujor e duke mbyllur ngushticën e bosforit që lidh detin marmara dhe detin e zi. Kompania ajrore turke po ashtu raportoi se të paktën gjashtë avionë të saj nuk mundën të uleshin në aeroportet pranë stambollit. Mësimi u pezullua ndërkohë që era e fortë vazhdoi të përplasej mbi qytet edhe mbrëmjen e djeshme. Zyrtarët thanë se pjesa më e madhe e vendit do të vazhdonte të përballej me kushte të tilla deri të martën pasdite dhe i kërkuan njerëzve të marrin masa për të evituar problemet gjatë motit të keq. Ndërkohë në total 116 incidente, përfshirë shkuljen e pemëve me rrënjë dhe hedhjen në tokë të cative janë regjistruar në Bursa, Bolu, Tekurdag dhe Jalova.