Rusia ka dërguar avionë bombardues me aftësi bërthamore, për të patrulluar kufijtë perëndimorë të Bjellorusisë, thanë autoritetet në Minsk, ndërsa tensionet janë rritur në mbarë Evropën Lindore. Dy bombardues të tipit Tu-22M3, të shoqëruar nga avionët luftarakë Su-30SM të forcave ajrore ruse dhe bjelloruse kryen patrullimet. Ky ishte misioni i tretë i këtij lloji që është kryer në këtë zonë gjatë këtij muaji. Tensionet ndërmjet Rusisë dhe Perëndimit janë rritur për shkak të grumbullimit të trupave ruse në kufi me Ukrainën. Në të njëjtën kohë, raportet e Bjellorusisë me Bashkimin Evropian janë përkeqësuar për shkak të krizës së migrantëve, teksa BE-ja thotë se Minsku e ka nxitur krizën me migrantë. Zyrtarët në Kiev kanë shprehur frikën se Moska mund ta përdorë territorin e Bjellorusisë për të mbështetur një sulm mbi Ukrainën. Shtetet e Bashkuara dhe NATO kanë paralajmëruar për “pasoja të rënda” nëse Rusia e sulmon Ukrainën. Rusia thotë se nuk ka ndër mend të bëjë një gjë të tillë por ëhstë e shqetësuar nga veprimet provokuese të Kievit dhe perëndimit shumë pranë kufijve rusë.