E pa vendosur mes Perëndimit e Rusisë, Serbia vijon të jetë në qendër të vëmendjes, si për qëndrimet e saj publike, ashtu edhe për akuza që e lidhin atë drejtpërdrejt me rusët. Së fundmi mediet ndërkombëtare raportojnë se Beogradi po përballet me akuza se operativë të dyshuar rusë kanë trajnuar qytetarë nga Moldavia në territorin serb, me qëllim që ata të nxisnin “trazira masive” para zgjedhjeve parlamentare që mbahen këtë fundjavë. Lidhur me këto akuza, autoritetet moldave bëjnë me dije se më 22 shtator janë kryer 250 bastisje dhe kanë arrestuar dhjetëra persona si pjesë e një hetimi lidhur me një plan të dyshuar dhe “të koordinuar nga Federata Ruse përmes elementeve kriminale”. Sipas po të njëjtave burime, shumica e të dyshuarve ishin ‘trajnuar’ në Serbi, e cila deri më tani as nuk e ka mohuar e as pranuar këtë pretendim. Kjo është hera e dytë që autoritetet e Moldavisë pretendojnë se Serbia është “mikpritëse” e qytetarëve moldavë, të cilët, nën patronazhin e strukturave ruse, pretendohet se po trajnohen për të nxitur trazira në Moldavi. Hera e parë kur u bën këto pretendime ishte para mbajtjes së zgjedhjeve parlamentare dhe referendumit në tetor të vitit 2024, kur Bosnja dhe Hercegovina po ashtu u përmend.