Ashtu si edhe paraardhësi i tij Ilir Meta, Presidenti i Republikës Bajram Begaj ka zgjedhur që vizitën e parë si kryetar i shtetit ta zhvillojë në Kosovë. Mësohet se Begaj do të zhvillojë të hënën një vizitë zyrtare në Kosovë, duke nisur kështu edhe serinë e takimeve që do të ketë nën petkun e Presidentit të Republikës. Ka qenë kryetari i Kuvendit të Kosovës, Glauk Konjufca, ai i cili ka bërë të ditur lajmin, teksa burime bëjnë me dije se vizita e parë vjen me ftesë të Presidentes së Kosovës Vjosa Osmani, me të cilën pritet të ketë takimin e parë, por edhe konferencën e parë për shtyp si President i vendit. Po ashtu mësohet se Begaj në vizitën 2 ditore në Kosovë do të ketë takim edhe me kreun e Kuvendit Klauk Konjufca si dhe me Kryeministrin Albin Kurti. Po ashtu në axhendën që pritet të bëhet publike, janë parashikuar takime edhe me figura të tjera politike si dhe vizitë në varrezat e dëshmorëve.