Bashkimi Europian do të "përgatisë me urgjencë sanksione të reja kundër Rusisë", thotë i ngarkuari i BE-së për Politikën e Jashtme, Josep Borrell. Ai megjithatë nuk bëri të qartë së çfarë sanksionesh janë duke u përgatitur dhe se kur do të merret vendimi për to. "Masakra në qytetin Butsha dhe në të tjera qytete ukrainase do të përfshihen në listën e mizorive të kryera në tokën europiane", tha Borrell. BE i dënoi ashpër "mizoritë" e pandehura se janë kryer prej forcave të armatosura ruse. "Ne jemi solidar me Ukrainën dhe me popullin ukrainas në këto orë trishtimi", tha Borrell. Ai bëri të qartë gjithashtu, se nga këndvështrimi i BE-së, autoritetet ruse janë përgjegjëse për mizoritë e kryera gjatë pushtimit të tyre. Për të nxjerrë përpara drejtësisë nëpunësit përgjegjës qeveritarë dhe ushtarakë, po mbështeten pakufizim hetimet e nisura nga Gjykata Ndërkombëtare Penale si dhe puna e komisionit hetimor të Komisarit të Lartë të OKB-së për të Drejtat e Njeriut, vuri në dukje Borrell. Në zonën periferike të Kievit, Butcha pas tërheqjes së trupave të ushtrisë ruse nga ky rajon i kryeqytetit ukrainas janë gjetur qindra kufoma civilësh. Numri i përgjithshëm i të vdekurve nuk është i qartë. Sipas të dhënave të kryebashkiakut të Butshas, Anatoly Fedoruk, në një varr masiv janë varrosur 280 vetë, ndërsa Prokurorja e Përgjithshme ukrainase Iryna Venediktova flet për 410 civile të vdekur në rajonin e Kievit.