Një bazë ushtarake amerikane, në Itali, u mbyll për një kohë të shkurtër të mërkurën për shkak të një "incidenti sigurie", konfirmoi marina amerikane. Baza ajrore dhe detare e sigonella-s, një qendër kryesore për operacionet e NATO-s në Mesdhe, u kërkoi trupave të vendosura atje të qëndronin atje ku ishin, të mërkurën në mëngjes. Në një postim në llogarinë zyrtare të bazës në Sicili, në Facebook, u kërkua nga trupat që të shmangin kalimin mes një kompleksi banimi dhe një pjese të bazës. Disa orë më vonë, një postim i ri njoftoi se alarmi kishte përfunduar. Një deklaratë nga baza tha se policia italiane dhe anëtarët e skuadrës së bombave inspektuan një pako të dyshimtë dhe në fund "përcaktuan se ajo nuk përbënte një kërcënim". “Ne i jemi mirënjohës personelit tonë të Forcës së Sigurisë së Marinës për reagimin e tyre të shpejtë”, tha baza në Facebook. Togeri i marinës amerikane Andrea Perez, një zëdhënës në bazë, konfirmoi se nuk kishte të lënduar, duke shtuar se më shumë detaje të incidentit do të publikohen në vijim. Baza e Sigonella-s është e vendosur afër Katanias në ishullin e Siçilisë. Personeli amerikan është vendosur atje për të identifikuar kërcënimet e mundshme raketore në rajon. Baza gjithashtu mban avionë zbulues të Marinës amerikane P-8 Poseidon dhe dronë MQ-4C Triton.