Lulzim Basha thotë se ka adresuar në Këshillin e Europës çështjen e arrestimit dhe dënimit të Ervin Salianjit me akuzën e kallëzimit të rremë. Kreu i demokratëve euroatlantikë mori pjesë në mbledhjen e grupit parlamentar të partive të djathta në KiE në seancë me sekretaren e komisionit të Venecias. Basha shkruan se seanca me zyrtare e Komisionit të Venecias ishte një mundësi për të theksuar çështjet që meritojnë vëmendje. BASHA - Nevoja për të çuar përpara vettingun në politikë, të bllokuar nga mazhoranca por i mbështetur në parim nga Komisioni i Venecias; kriza kushtetuese e nxitur nga mosrespektimi i vendimeve të Gjykatës Kushtetuese për mandatin e deputetes Xhaçka, si dhe arrestimi i deputetit të opozitës Ervin Salianji me akuzën e kallëzimit të rremë, ndërkohë që vëllai i ish-ministrit Xhafaj rezultoi të ishte i dënuar dhe vetë ministri subjekt i ligjit anti-mafia, janë çështje që meritojnë vëmendjen e Komisionit të Venecias dhe KiE, për forcuar përpjekjet e përbashkëta në lidhje me sfidat me të cilat përballen shteti i së drejtës, sundimi i ligjit dhe demokracia funksionale në Shqipëri. Në lidhje me dënimin e Salianjit, ky është reagimi i parë i Lulzim Bashës, ndërsa më herët kanë reaguar si grupim ‘demokratët euroatlantikë’.