Policia e Krujës ka parandaluar një ngjarje të rëndë që mund të përfundonte me viktima në një familje në lagjen “Derede”, ku kryefamiljari po ushtronte dhunë ndaj bashkëshortes së tij dhe vajzës së mitur dhe po i kanoste ato me armë zjarri Menjëherë pas marrjes së njoftimit patrulla e policisë u nis me shpejtësi ku bëri të mundur prangosjen e 44-vjeçarit. Po ashtu gjatë aksionit të koduar “On Time” u arrestua edhe djali 22-vjeçar pasi rezultoi se dhe ai kishte rrahur nënën dhe motrën e tij. Gjatë kontrollit në banesë, policia gjeti dhe sekuestroi një armë zjarri kallashnikov, dy krehra dhe municion luftarak, të cilat posedoheshin pa leje nga 44-vjeçari. Të arrestuarit do të përballen me akuzat për dhunë në familje dhe armëmbajtje pa leje, ndërsa materialet i kaluan Prokurorisë së Rrethit Krujë për veprime të mëtejshme procedurale.