Pilotët afganë të trajnuar nga SHBA dhe të tjerë, që po qëndrojnë në një kamp në Uzbekistan, kanë frikë se mos kthehen pas në afganistanin e sunduar nga talebanët. Talebanët, që tani kanë në duar një numër të madh mjetesh ajrore, avionë luftarakë dhe helikopterë, që iu morën ushtrisë së kapitulluar afgane ose që u lanë pas nga amerikanët, kanë nevojë urgjente për pilotë, dhe ata të trajnuar nga SHBA dhe NATO, janë të shumëkërkuar prej tyre. Janë disa pilotët afganë, që fluturuan bashkë me avionët e tyre përtej kufirit verior të afganistanit, në Uzbekistan, duke u larguar nga vendi para se talebanët të merrnin kontrollin. Prej më shumë se tre javësh, ata kanë qëndruar në pritje të evakuohen nga shtetet e bashkuara. Por ende nuk ia kanë dalë mbanë. Nëse Uzbekistani i kthen pas, ata kanë frikë. “Nëse na kthejnë, jam 100 për qind i sigurt se do të na vrasin”, thotë një nga pilotët. Edhe para se talebanët të merrnin kontrollin, pilotët afganë, që flasin anglisht dhe që janë trajnuar nga amerikanët, u bënë objektiva kryesore të islamikëve. Luftëtarët talebanë i gjurmonin dhe madje edhe kanë ekzekutuar disa pilotë. Në ditët dhe orët e fundit para se talebanët të shtinin vendin në dorë, disa pilotë afganë u larguan me 46 avionë ushtarakë, më shumë se një e katërta e flotës prej rreth 160 mjetesh ajrore që kishte ushtria afgane. Pjesa më e madhe e tyre u larguan nga Kabuli, por disa erdhën edhe nga një bazë vetëm pak larg kufirit, afër qytetit verior Mazar i Sharif, duke iu larguar luftëtarëve talebanë që po sulmonin bazën. Në një episod dramatik, një avion afgan u përplas me një avion nga uzbekistani, duke detyruar pilotët të katapultoheshin në ajër. Piloti afgan që ka folur për Reuters, thotë se kishte rreth 15 pilotë që u larguan me avionë luftarakë A-20 Super Tucano, 11 me helikopterë Black Haëk,12 me helikopterë MD 530 dhe shumë të tjerë me helikopterë Mi-17.