Ndoshta mund të konsiderohet historike, por për herë të parë pas lufte, partie shqiptare në Kosovë bëhen bashkë nën një kandidat për zgjedhjet lokale. Lëvizja Vetëvendosje, Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës, janë bërë bashkë në të ashtuquajturën Nisma Aleanca shqiptare, duke kandiduar kështu Leutrim Ajetin për në zgjedhjet e ardhshme lokale, për komunën e Graçanicës, një komunë me shumicë serbe, pak minuta nga Prishtina. Kandidat për kryetar të komunës nga kjo iniciativë do të jetë Leutrim Ajeti, i cili deri më tani ka qenë i vetmi asambleist apo anëtar këshilli bashkiak shqiptar në Kuvendin e Komunës së Graçanicës dhe ka shërbyer si zëvendëskryetar i kryetares Lilana Shubariq nga Lista Serbe. Kjo iniciativë, e cila bashkon katër subjekte politike shqiptare, synon të forcojë zërin dhe përfaqësimin e shqiptarëve në institucionet lokale të kësaj komune. Shqiptarët me këtë kandidim tentojnë të shkojnë në balotazh dhe të shtojnë numrin e këshilltarëve në Komunën e Graçanicës.