Hakerat e grupit Anonymous njoftuan në tëitter se kishin zbuluar dhe nxjerrë online të dhënat personale të 120 mijë ushtarëve rusë. “Të gjithë ushtarët që marrin pjesë në pushtimin e Ukrainës, duhet të dalin para një gjykate për krime lufte”, tha Anonymous në mesazh. Të dhënat, përfshijnë informacione personale si data e lindjes, adresa, numri i pasaportës dhe njësia ku ushtarët shërbejnë. Anonymous po ashtu tha se do të duhej kohë që shoqëria të mund të harronte mizoritë e kryera në Ukrainë nga pushtuesit rusë. Edhe pse Anonymous e publikoi këtë nxjerrje informacionesh vetëm tani së fundmi, ajo raportohet se ka ndodhur në fillim të marsit. Pravda, një gazetë ukrainase, shkruante pak ditë pas pushtetit se hakerat e Anonymous kishin të dhënat personale të ushtarëve të putinit. Këtë javë ndërkohë, ushtria ruse po përballet akoma me më shumë zemërim pas shqetësimeve të ngritura në lidhje me mizoritë në Bucha. Sipas raporteve, civilët janë torturuar dhe vrarë dhe trupat janë lënë nëpër rrugë apo janë hedhur në gropa në pyje. Që kur Rusia pushtoi Ukrainën, Anonymous ka qenë shumë i zëshëm për luftën. “Sulmet tona kibernetike do të vazhdojnë deri sa rusia të ndalë agresionin e saj”, ka thënë Anonymous.