Një anije mallrash në pronësi turke është fundosur në Detin e Zi pasi u godit nga dronë dhe u përfshi nga flakët. Anija, e cila transportonte drithë nga Ukraina drejt Italisë, ishte nisur nga porti ukrainas i Izmailit vetëm rreth tri orë para incidentit. Dy marinarë humbën jetën, 11 u shpëtuan, ndërsa një tjetër rezulton ende i zhdukur. Anija “Royad Mammadov”, e cila lundronte nën flamurin e Saint Kitts dhe Nevis, po udhëtonte drejt Ravenës kur u godit rreth 20 milje larg brigjeve të Rumanisë. Pas shpërthimeve në bord, autoritetet rumune nisën një operacion të gjerë shpëtimi me anije dhe helikopterë. Tre nga marinarët e shpëtuar u dërguan në spitalin e Konstancës dhe ndodhen jashtë rrezikut për jetën. Deri tani nuk është përcaktuar zyrtarisht se kush qëndron pas sulmit. Presidenti ukrainas Volodymyr Zelensky akuzoi Rusinë, duke thënë se anija civile ishte goditur nga dy dronë rusë në ujëra neutrale. Zelensky e cilësoi incidentin si një sulm të rëndë ndaj lundrimit civil dhe kërkoi rritjen e presionit ndërkombëtar ndaj Moskës për të garantuar sigurinë e korridoreve detare dhe eksporteve ushqimore.