Kapiteni i arrestuar tashmë i një anijeje mallrash që u përplas me një cisternë në Detin e Veriut është një shtetas rus, ka konfirmuar pronari i anijes. Policia e Humberside tha se 59-vjeçari është vendosur në paraburgim pasi u arrestua me dyshimin për vrasje të rëndë nga pakujdesia të martën. Anija Solong me flamur portugez dhe cisterna Stena Immaculate e regjistruar në SHBA u përplasën në brigjet Lindore të Yorkshire-it të hënën. Një anëtar i zhdukur i ekuipazhit nga anija e mallrave supozohet i vdekur pasi një operacion kërkimi dhe shpëtimi u anulua vonë të hënën. Policia tha se kishte nisur një hetim penal për shkakun e përplasjes dhe po punonte me Agjencinë Detare dhe Roje Bregdetare. Të martën, zyrtarët thanë se Policia e Humberside-it ka marrë në dorë hetimin e çdo vepre penale të mundshme të lindur nga përplasja midis dy anijeve. Tashmë ka nisur puna dhe ne po punojmë ngushtë me partnerët tanë për të kuptuar se çfarë ndodhi dhe për të ofruar mbështetje për të gjithë ata që janë prekur, thanë ata. Roja bregdetare tha se 36 persona ishin shpëtuar dhe u dërguan në mënyrë të sigurtë në breg. Stena Immaculate mbante 220,000 fuçi karburant aviacioni për t'u përdorur nga ushtria amerikane. Të dyja anijet morën flakë pas përplasjes duke shkaktuar një reagin të madh nga shërbimet e urgjencës.